Alamin kung ano ang listahan na dapat mong sundin upang pumayat sa pamamagitan ng gabay na itoo mula sa doctor.

Kakulangan sa Disiplina sa Diet o Lumalaban Ang Katawan Kaya Tumataas Ang Timbang?

Kapag binawasan mo ang kinakain mo, hindi basta nababawasan ang timbang mo dahil lumalaban ang katawan mo. Tumataas ang mga hormone na nagpapagutom, bumababa ang enerhiyang ginagastos mo sa isang araw, at mas madali kang mapagod. Ganito ang disenyo ng katawan ng tao. Para sa katawan, ang biglaang pagbaba ng pagkain ay panganib, at ang trabaho niya ay ipagtanggol ang timbang na nakasanayan niya.

Kaya may tinatawag na plateau. Bumababa ng kaunti sa unang ilang linggo, tapos huminto. Hindi ito tanda na sumuko ka. Tanda ito na gumagana ang katawan mo ayon sa disenyo nito. Ganito rin ang tingin ng World Health Organization sa obesity. Sa WHO fact sheet, ang obesity ay isang chronic at relapsing disease na nagmumula sa pagsasama-sama ng genetics, ng utak at hormones, ng gawi sa pagkain, at ng kapaligiran.

Tandaan: Chronic, ibig sabihin matagalan. Relapsing, ibig sabihin bumabalik. Walang salitang “disiplina” sa kahulugang iyon.

Mga Medical na Dahilan na Inaalam ng Doktor

Hindi lahat parehas ng dahilan sa kanilang pagtaas ng timbang, ngunit may ilang aspeto na tinitignan ang mga expert. Ito ang apat na madalas tingnan ng doktor bago ang lahat.

Thyroid

Ang thyroid ay maliit na glandula sa leeg na kumokontrol kung gaano kabilis gumastos ng enerhiya ang katawan mo. Kapag mabagal ito, na tinatawag na hypothyroidism, bumabagal din ang lahat: mas madaling tumaas ang timbang, laging pagod, laging nilalamig, tuyo ang balat, nalalagas ang buhok, at hirap dumumi.

Isang blood test ang karaniwang paraan para malaman kung ito ang dahilan, at ang doktor ang magpapasya kung kailangan mo nito. Karaniwang kaunti lang ang idinadagdag nito sa timbang, kaya tinitingnan ito dahil madali itong i-test at gamutin, hindi dahil ito ang buong sagot.

PCOS/PMOS 

Para sa mga babae, isa ito sa mga karaniwang dahilan. Irregular ang regla, may tigyawat, may buhok sa mukha o katawan na hindi dati, hirap magbuntis, at tumataba lalo na sa tiyan. Madalas may kasama itong insulin resistance, kung saan hindi na pinapakinggan ng katawan ang insulin nang maayos, kaya mas madaling mag-imbak ng taba.

Simula Mayo 2026, ang bagong pangalan na ginagamit na ng mga international na grupo ay PMOS, polyendocrine metabolic ovarian syndrome. Kahit nagkaroon ng pagbabago sa pangalan nito, pareho pa rin ang doktor na tumitingin dito.

Tulog at Stress

Puyat, night shift, sleep apnea, lahat ng ito ay gumugulo sa mga hormone na nagsasabi kung gutom ka o busog. Kapag kulang ka sa tulog, mas lumalakas ang iyong cravings sa matamis at mamantikang pagkain.

Samantala, ang matagalang stress ay nakakaapekto sa tulog, sa gutom, at sa mga hormone tulad ng cortisol. Dahil dito, mas mataas ang posibilidad ng pagtaas ng timbang, lalo na sa tiyan.

Basahin ang kaugnay na artikulo tungkol sa epekto ng night shift sa katawan

Gamot na Nagpa-pataas ng Timbang

May mga gamot na may side effect na pagtaas ng timbang: ilang steroid, ilang gamot sa depresyon at anxiety, at ilang gamot sa high blood na tinatawag na beta blocker. Kung nagsimula kang tumaba noong nagsimula ka ng bagong gamot, sabihin mo ito sa doktor. Pero huwag mong ititigil ang gamot nang ikaw lang ang nagdesisyon. Ang doktor na nagreseta ang makakapagsabi kung may ibang pwedeng gamitin, o kung mas mahalaga ang gamot kaysa sa timbang.

Kanino Dapat Kumonsulta?

Sino ang pupuntahan? Kung hinala mo ay hormones, thyroid, o PCOS, endocrinologist ang espesyalista rito. Kung gusto mo ng doktor na titingin sa kabuuan ng kalusugan mo bilang adult, internal medicine. Pareho silang pwedeng mag-umpisa ng pagsusuri at mag-refer kung kailangan.

Maaaring kumonsulta sa kanino mang doktor sa NowServing. Pwede kang kumonsulta online o bumisita sa klinika ng weight management doctor, endocrinologist, o internal medicine basta mag-book lamang ng iyong consultation sa NowServing.

Frequently Asked Questions

Normal ba na hindi bumababa ang timbang kahit kumakain ako ng kaunti?

Karaniwan ito, at hindi ibig sabihin na may mali sa iyo. Lumalaban ang katawan sa biglaang pagbawas ng pagkain sa pamamagitan ng pagbagal ng paggastos ng enerhiya. Kung ilang buwan na itong ganito, sulit na ipatingin sa doktor kung may medical na dahilan.

Anong doktor ang dapat kong puntahan kapag hirap akong magpapayat?

Endocrinologist kung ang hinala ay hormones, thyroid, o PCOS. Internal medicine doctor kung gusto mo ng pangkalahatang pagsusuri bilang adult. Pareho silang makakapag-umpisa ng tests at makakapag-refer kung kailangan ng ibang espesyalista.

Anong tests ang pwedeng ipagawa ng doktor?

Depende sa nakikita niya sa iyo. Karaniwan ay thyroid test, blood sugar, at cholesterol; para sa mga babae, minsan hormone tests. Ang doktor ang magpapasya kung alin ang kailangan mo, kaya hindi na kailangang magpagawa ng tests nang mag-isa bago ang konsulta.

Pwede bang thyroid ang dahilan kung bakit hindi ako pumapayat?

Pwede, lalo na kung may kasamang laging pagod, nilalamig, tuyong balat, o nalalagas na buhok, pero karaniwang kaunti lang ang idinadagdag nito sa timbang. Isang blood test ang karaniwang paraan para malaman. Kung ito ang dahilan, may gamutan ito, at ang endocrinologist ang tumitingin dito.

Kailangan ko bang itigil ang gamot ko kung ito ang nagpapataba sa akin?

Hindi, hindi nang ikaw lang ang nagdesisyon. Sabihin mo sa doktor na nagreseta na napansin mong tumaas ang timbang mo. Siya ang makakapagsabi kung may ibang pwedeng gamitin o kung mas mahalaga ang gamot kaysa sa pagbabago ng timbang.

Magkano ang konsulta?

Sa NowServing, ang konsulta sa endocrinologist o internal medicine doctor ay nagsisimula sa Php 500, at nag-iiba depende sa doktor at klinika. Hiwalay ang bayad sa mga lab test kung magpapagawa. Ang ilang HMO plan ay sumasagot ng konsulta kapag may diagnosis, pero nag-iiba kung sakop ang weight management mismo; tingnan ang plano mo.

Konklusyon

Kung ilang buwan ka nang nagsisikap at hindi gumagalaw ang timbang, may doktor na kayang hanapin kung may medical na dahilan, at sabihin kung ano ang susunod na hakbang. Mas mabilis iyon kaysa sa isa pang taon ng panghuhula.

Mag-book ng consultation sa endocrinologist sa NowServing. Maaari rin sa internal medicine kung mas gusto mo ng pangkalahatang doktor para sa adult.

Pwede ka rin magsimula sa online assessment, bisitahin ang NowExpress para simulan ang pagpapapayat nang may gabay ng doctor.

The post Bakit Hirap Magpapayat Kahit Nagdi-diet Ka Na: Ang Sagot ng Doktor appeared first on NowServing Health.

Ang pananaba ng katawan ay maaaring normal lamang, ngunit kung labis na ito sa BMI mo, dapat mo na itong ikabahala. Bukod dito, magkaiba ang obesity sa gained weight, at doctor lamang ang makakapagbigay ng diagnosis na ito. Alamin kung ikaw ay may obesity sa tulong ng kumpletong gabay na ito.

Ano Ang Obesity?

Ang obesity ay ang kondisyon kung saan sobra na ang taba sa katawan hanggang sa nakakaapekto na ito sa kalusugan. Para masukat ito, ginagamit ng doktor ang BMI, o body mass index: ang timbang mo sa kilo, hinati sa taas mo sa metro, squared. Hindi ito perpektong sukatan, at alam iyon ng mga doktor, pero ito ang panimulang numero ng lahat.

Mayroong global chart, kung saan 30 ang simula ng obesity. Hindi iyon ang chart na ginagamit sa Pilipinas. Ang Asia-Pacific classification ng World Health Organization ay mas mababa ang mga hangganan, dahil mas maagang tumataas ang panganib ng diabetes at sakit sa puso sa mga Asyano. Ito ang sinusunod ng Philippine Clinical Practice Guidelines for Obesity, na ginawa ng Philippine College of Physicians kasama ang PASOO, PAMOS at ang Department of Health.

Ganito ang chart na sinusunod ng mga guideline sa Pilipinas:

• Mababa sa 18.5: Underweight, o kulang sa timbang.
• 18.5 hanggang 22.9: Normal.
• 23 hanggang 24.9: Overweight, o nasa panganib na.
• 25 hanggang 29.9: Obese, class I.
• 30 pataas: Obese, class II.

Kaya ang BMI na 25, na “overweight” lang sa global chart, ay obesity na sa chart na ginagamit sa Pilipinas. Hindi dahil mas mahigpit ang Pilipinas. Dahil ito ang chart na ginawa para sa katawan ng mga tulad natin.

Bakit Kinikilalang Sakit Ang Obesity?

Ayon sa World Health Organization ay tinuturing ang obesity bilang chronic at relapsing disease o isang sakit na matagalan at bumabalik. Ganito rin ang tingin ng Philippine Clinical Practice Guidelines for Obesity: isang chronic disease na nangangailangan ng buong plano ng paggamot, hindi ng isang diet.

Ibig sabihin, hindi “kakulangan ng disiplina” ang dahilan ng pagkakaroon ng obesity. Upang mas maintindihan kung anong ang pinagmulan nito, narito ang ilan sa tinutukoy na sanhi. 

Genetics

Kung maraming tumataba sa pamilya mo, mas malaki ang tsansa mong tumaba rin, kahit magkaiba ang kinakain ninyo. Nakalagay sa genes kung gaano kabilis mabusog, kung saan nag-iimbak ng taba ang katawan, at kung gaano kabilis gumastos ng enerhiya. Hindi mo ito pinili.

Hormones

May mga kondisyon na nagpapahirap magpapayat tulad ng pagkakaroon ng mabagal na thyroid. Kung ikaw ay may PCOS, na tinatawag na ring PMOS mula noong Mayo 2026, isa rin ito sa tinuturong sanhi. Pinakahuli ay ang insulin resistance sa diabetes na dahil sa hindi na pinapakinggan ng katawan nang maayos ang hormone na nag-aayos ng asukal sa dugo.

Tulog

Kapag kulang ka sa tulog, nagugulo ang mga hormone na nagsasabi kung gutom ka o busog. Mas gusto mo ng matamis kinabukasan, mas mahirap tumanggi, at mas kaunti ang enerhiya mong gumalaw. Ang night shift at ang hilik na may hinto sa paghinga ay pareho ring tinitingnan ng doktor, dahil pinapalala nila ang problema, at hindi mo kasalanan ang alinman.

Stress

Isa ang stress sa dapat bantayan dahil malaki ang epekto nito sa pagtaas ng timbang, lalo na sa may tiyan. Ang stress ay nakakapagpataas ng cortisol, nakakaapekto sa tulog. at nakapagpataas. ng iyong kagustuhang kumain nang kumain.

Bakit Bumabalik Ang Timbang Pagkatapos ng Diet?

Kapag binawasan mo ang pagkain, binabasa ito ng katawan bilang kakulangan, kaya tumataas ang gutom at bumababa ang enerhiyang ginagastos mo kahit nakaupo ka lang. Ito ang ibig sabihin ng “relapsing” sa kahulugan ng WHO, at ito ang dahilan kung bakit ang plano ng doktor ay may follow-up, hindi isang listahan ng bawal.

Kailan Dapat Magpa-konsulta

• Kapag narinig mo na ang salita: Kung ginamit na ito ng doktor o nakasulat na sa resulta mo, ang susunod na hakbang ay konsulta, hindi diet.
• Kapag 25 pataas ang BMI mo sa calculator: Hindi ito diagnosis, pero sapat na itong dahilan para ipatingin.
• Kapag may kasamang sintomas: Laging pagod, laging nilalamig, irregular na regla, malakas na hilik, uhaw at ihi nang madalas.
• Kapag may diabetes, high blood, o sakit sa puso sa pamilya: Mas maaga ang dapat na pagpapatingin.
• Kapag ilang buwan ka nang nagsisikap at walang nagbabago: May dapat hanapin ang doktor.

Ano Ang Tinitingnan ng Doktor

Ang unang itinatanong ng doktor ay kung kailan nagsimula ang pagbabago ng iyong timbang. Itatanong din kung may sakit ka ba na matagal nang ginagamot kagaya ng diabetes, thyroid, PCOS/PMOS, hypertension, at sakit sa puso. Mahalagang sagutin ito upang malaman ng doctor kung ano ang posibleng naging risk factor na nagdulot ng iyong pananaba.

Hihingan ka rin ng doctor mga tests o laboratory tests:

• blood test
• blood sugar
• cholesterol
• thyroid

Ang doktor ang magpapasya kung ano ang dapat mong gawin pagkatapos tingnan ang resulta ng iyong mga laboratory tests. Isa sa posibleng maging plano ay ang pag-pili sa pwedeng kainin, pageehersisyo, at ang gamot para sa weight loss.

TANDAAN: Ang surgery para sa pagbabawas ng timbang ay dapat na pinakahuling treatment lamang. Hindi ito ang pangunahing solusyon na irerekomenda ng doctor.

Basahin ang kaugnay na artikulo tungkol sa weight management sa Pilipinas

Paano Kumonsulta sa Obesity Doctor sa NowServing

Madali lamang makahanap ng obesity medicine doctor sa NowServing:

• Buksan ang NowServing app o i-access ang Obesity Medicine page gamit ang link na ito
• Pumili ng doctor at mag-schedule ng consultation
• Hintayin na aprubahan ng doctor ang iyong consultation

Bukod dito, maaari ka rin kumonsulta sa iba pang especialista tulad ng endocrinologist, internal medicine, lifestyle medicine, at iba pa. I-download na ang NowServing app sa iyong device upang malayang makapamili ng doctor na iyong gustong makausap para sa obesity.

Mga Kadalasang Tanong Tungkol sa Obesity

Anong BMI ang obese sa Pilipinas?

BMI na 25 pataas, ayon sa Asia-Pacific classification na sinusunod ng mga doktor sa Pilipinas. Ang 23 hanggang 24.9 ay overweight. Mas mababa ito sa global chart dahil mas maagang tumataas ang panganib sa kalusugan sa mga Asyano.

Iba ba ang obesity sa overweight?

Oo, magkaibang antas sila sa iisang chart. Sa Pilipinas, overweight ang 23 hanggang 24.9 at obesity ang 25 pataas. Pareho silang dahilan para magpatingin, pero mas mataas ang panganib sa kalusugan sa obesity.

Sakit ba talaga ang obesity?

Oo. Tinuturing ito ng World Health Organization bilang chronic at relapsing disease, at ganoon din ang tingin ng Philippine Clinical Practice Guidelines for Obesity. Kaya ang plano ng doktor ay may follow-up at pagsusuri ng dahilan, hindi isang diet lang.

Namamana ba ang obesity?

Bahagi nito, oo. Ang genes ay nakakaapekto sa gutom, sa pag-iimbak ng taba, at sa bilis ng paggastos ng enerhiya, kaya mas malaki ang tsansa kung maraming tumataba sa pamilya. Pero kasama rin ang tulog, stress, hormones, at kapaligiran, at ang doktor ang tumitingin kung alin sa mga ito ang nangyayari sa iyo.

Anong doktor ang tumitingin sa obesity?

Endocrinologist para sa hormones, thyroid, at PCOS. Internal medicine doctor para sa kabuuang kalusugan ng adult. Family medicine doctor para sa unang pagsusuri malapit sa bahay. Pwede ring i-refer ka nila sa registered nutritionist-dietitian para sa plano ng pagkain.

Magkano ang konsulta sa NowServing para sa obesity?

Sa NowServing, nagsisimula sa Php 500 ang konsulta sa endocrinologist o internal medicine doctor, at nag-iiba ito depende sa doktor at klinika. Hiwalay ang bayad sa lab tests na ipapagawa ng doktor. Tingnan ang HMO plan mo kung may sagot ito sa konsulta, at kung sakop ang weight management mismo.

Konklusyon

Ang salitang narinig mo tungkol sa iyong pagtaba ay hindi hatol sa pagkatao mo. Pangalan ito ng kondisyon na may numero, may mga dahilan na kayang hanapin, at may doktor na alam kung saan magsisimula.

Kumonsulta agad sa doctor upang malaman kung normal pa ba ang iyong timbang o maaari na itong makasama sa iyong kalusugan. Mayroong especialista sa NowServing tulad ng obesity medicine doctor, endocrinologist, internal medicine, at iba pa.

Pwede ka rin magsimula online sa pamamagitan ng assessment sa NowExpress!

The post Ano Ang Obesity: Sakit Ba Ito? appeared first on NowServing Health.

Introduksyon

Ang pagbabakuna ay isang mahalagang bahagi ng pagtiyak sa kalusugan ng iyong sanggol at proteksyon laban sa mga sakit na maaaring magdulot ng panganib sa buhay. Ito ay isang uri ng paggamot sa kalusugan na makakatulong sa pagpapalakas ng immune system ng iyong sanggol laban sa ilang uri ng nakakahawang sakit. Kaya bilang isang magulang, tungkulin mong tiyakin na ang iyong sanggol ay protektado. Simulan sa pag-alam ng bakuna schedule para sa sanggol sa Pilipinas, at sundin ang inirekomendang mga buwan at taon ng edad para sa bawat dose ng bakuna.

Kung kakapanganak mo lang o naghahanap ka ng pinakabagong schedule ng bakuna sa Pilipinas, ang gabay na ito ay naglalaman ng mahalagang impormasyon na kailangan mo. Mula sa 0 hanggang sa ilang buwan ng edad, alamin kung aling bakuna ang itinakda para sa iyong sanggol. Magsimula na tayo!

Bakit Mahalaga Ang Bakuna Para sa Mga Bata

Sa tulong ng makabagong teknolohiya, nakagawa ang kagawaran ng kalusugan ng paraan upang labanan ang mga viral at bacterial na impeksyon sa pamamagitan ng mga bakuna. Ang ilan sa mga sakit ay itinuturing na nakamamatay dahil sa pangmatagalang epekto nito na nagdudulot ng mga komplikasyon sa kalusugan. Dahil ang mga sanggol ay wala pang malakas na immune system, sila ay madaling kapitan ng mga ganitong sakit. Sa ganitong sitwasyon, ang pagbibigay ng bakuna sa mga bata ay kinakailangan upang maiwasan ang mga komplikasyon at patibayin ang kanilang resistensya laban sa mga sakit.

Narito ang ilan sa mga sakit na kayang labanan ng bakuna:

• measles
• polio
• tuberculosis
• hepatitis b virus
• pneumonia
• meningitis
• flu
• pertussis or whooping cough
• mumps
• rubella
• chicken pox
• Encephalitis

Ilan lamang ito sa mga nakamamatay na sakit na maaaring makuha ng iyong sanggol dahil sa kakulangan sa proteksyon. Kaya’t pinakamainam na mabakunahan ang mga bata upang matiyak kanilang pangkalahatang proteksyon sa lalong madaling panahon.

Bumisita sa NowServing upang humanap ng doktor sa lagnat sa Pilipinas

Bakuna ng Bata Chart sa Pilipinas

Ang DOH ay sumusunod sa isang komprehensibong iskedyul ng pagbabakuna na inirerekomenda ng World Health Organization (WHO) at ng Philippine Pediatric Society. Narito ang schedule at kumpletong listahan ng bakuna sa bata sa Pilipinas:

*Schedule ng bakuna sa bata batay sa panibagong update ng PIDSP noong July 2026

Saan Dapat Magpabakuna Ang Bata sa Pilipinas

Tulad ng nabanggit, mahalaga para sa iyong sanggol na mabakunahan, mula sa kapanganakan hanggang sa umabot sila sa isang tiyak na edad. Kung naghahanap ka ng mga lokasyon para dalawin para sa nakatakdang bakuna ng iyong sanggol, huwag mag-atubiling tingnan ang mga sumusunod na lugar!

Government Health Centers (Libreng Bakuna)

Ang Department of Health ay sumusunod sa programang sinusuportahan ng WHO at UNICEF upang magbigay ng access sa mga bakuna para sa mga bata. Ang programang ito ay tinatawag na Expanded Program for Immunization (EPI) o National Immunization program. Ang layunin nito ay bawasan ang tumataas na bilang ng mga kaso ng pagkamatay dahil sa malubhang sakit, at ang posibleng pangunahing dahilan ay ang mahinang immunity sa sakit.

Sa pamamagitan ng programang ito, maaaring makatanggap ng libreng bakuna ang mga bata sa mga lugar na ito:

• barangay health centers
• public hospitals

Pribadong Ospital

Bukod sa mga klinikang kaakibat ng gobyerno, maaari ring bisitahin ang mga pribadong ospital para sa bakuna ng bata, ngunit may bayad ito. Ang mga pangunahing ospital tulad ng St. Luke’s Medical Center, Makati Medical Center, The Medical City, at Philippine Children’s Medical Center ay nagbibigay ng kumpletong serbisyo sa pagbabakuna.

Mga Lokal na Pediatric Clinics

Para sa mga mas gustong pumunta sa mga pribadong klinika malapit sa inyong lugar, maaari kayong makahanap ng ilang lokal na klinika ng pediatrics na nag-aalok ng bakuna para sa mga bata. Karamihan sa kanila ay mga doktor na hindi nagtatrabaho sa ospital, kundi mga licensed specialists. Kung nais mong makahanap ng ganitong uri ng doktor malapit sa iyo, maaari mong subukang maghanap ng mga doktor gamit ang NowServing.

Maaari ka ring mag-book ng appointment sa pamamagitan ng NowServing kapag nakahanap ka na ng pinagkakatiwalaang pediatrician malapit sa’yo.

Healthcare Platform – NowServing

Maaari kang mag-book ng appointment online para sa pagbabakuna ng bata sa gamit ang NowServing app. Humanap at kumunsulta sa pediatrician upang malaman ang schedule ng bakuna para sa iyong anak. Ang NowServing ay isang healthcare app sa Pilipinas na nagbibigay-daan sa iyo na makipag-ugnayan sa mga lisensyadong doktor agad-agad. Kung ito man ay isang online consultation o face-to-face consultation, maaari kang mag-book ng session dito.

Maaari mo rin gamitin ang NowServing Baby Book upang subaybayan ang schedule ng bakuna ng iyong sanggol. Hanapin ang pediatric doctor ng iyong sanggol sa NowServing at i-download ang app upang magkaroon ng access sa digital baby book.

Tandaan: Maaari mo lamang makuha ang baby book ng iyong anak kapag may pediatrician siya sa NowServing at kapag mayroon kang NowServing app.

Alamin ang iba pang kundisyon upang magamit ang NowServing Baby Book sa tulong ng gabay na ito.

Paghahanda sa Milestones ng Iyong Baby Boy

Bukod sa bakuna, isa sa pinaghahandaan ng mga magulang sa Pilipinas ay ang pagtutuli ng kanilang sanggol sa mga unang buwan. Ang tuli o circumcision ay isang medical procedure na ginagawa sa mga lalaki kapag tumuntong sila sa edad na 10 – 14. Gayunpaman, may ilang mga magulang na mas gustong tulian ang kanilang anak ilang linggo pagkatapos ng kapanganakan.

Maaari kang mag-book ng consultation sa isang urologist o pediatric surgeon sa NowServing para malaman ang pinakamainam panahon para sa tuli.

Subaybayan ang milestones ng iyong sanggol sa pamamagitan ng artikulong ito.

Magkano ang Bakuna Para sa Sanggol sa Pilipinas?

May iba’t-ibang presyo ng bakuna sa Pilipinas, na nakadepende sa lokasyon na pinili mo para sa nakatakdang pagbabakuna. Kasabay nito, ang uri ng bakuna ay nakakaapekto rin sa halaga. Dahil sa mga salik na iyon, narito ang mga posibleng presyo ng bakuna sa mga bata.

• Public Health Centers: Libre (Government-funded vaccinations)
• Pribadong Clinic/Ospital:
  • Hepatitis B Vaccine Price: ₱850.00 to ₱1,600.00 per dose
  • Pentavalent Vaccine Price: PHP 2,500- PHP 4,000 per dose
  • PCV Vaccine Price: PHP 3,000 PHP 5,550 per dose
  • MMR Vaccine Price: PHP 1,350- PHP 2,000 per dose
  • Influenza Vaccine Price: PHP 800- PHP 1,450 per dose
  • TDAP Vaccine Price: PHP 2,370 per dose

Tandaan na ang ilan sa mga presyong ito ay konektado sa Hi-Precision, isa sa partner private clinic ng NowServing. Huwag mag-atubiling alamin ang tiyak na halaga sa iyong doktor.

Mag-Book ng Pediatrician Para sa Bakuna ng Bata sa Pilipinas

Isa sa pinaka mabilis na paraan upang magkaroon ng pediatric doctor para sa bakuna ng iyong sanggol ay ang paggamit ng NowServing. Narito ang simpleng proseso na maaari mong sundan:

1. Buksan ang NowServing website o i-click ang link na ito upang makita ang listahan ng mga pediatrician sa Pilipinas.
2. Maaari mo ring gamitin ang Children’s Vaccination link at piliin ang pinakamahusay na espesyalista sa pediatrics.
3. I-click ang “Book Appointment” na button sa tabi ng pangalan ng iyong piniling pediatrician.
4. Punan ang form ng iyong mga detalye at piliin ang petsa upang matapos ang proseso ng pag-book.
5. Maghintay ng mensahe ng kumpirmasyon mula sa iyong doktor.

Isa pang opsyon ay ang mag-book ng Children’s Vaccination service sa NowServing app. I-download ang app at piliin ang opsyon na Children’s Vaccination.

Kung nag-aalala ka tungkol sa iba pang kondisyon sa kalusugan, tulad ng autism sa mga sanggol, maaari kang kumonsulta sa isang developmental behavioral pediatrician na doktor sa NowServing.

Mga Kadalasang Tanong

Ano ang mangyayari kung hindi nakakuha ng nakatakdang bakuna ang aking sanggol?

Kung hindi nakakuha ng bakuna ang iyong sanggol, huwag mag-alala dahil maaari pa rin itong matanggap ng bata. Kumonsulta agad sa isang pediatrician upang makahabol sa mga na-miss na bakuna.

Ligtas ba ang mga bakuna para sa mga sanggol?

Oo, ayon sa rekomendasyon ng DOH, WHO, at UNICEF, dapat mabakunahan ang iyong sanggol upang maiwasan ang pagkakaroon ng mga sakit. Ang mga bakunang ito ay ligtas dahil dumaan sila sa masusing pagsusuri, at may aprubado na gamitin sa masa.

May mga side effect ba ang mga bakuna?

Ang ilang mga sanggol ay maaaring makaranas ng bahagyang lagnat, pamumula, o pamamaga sa lugar ng injection, na mga normal na tugon ng immune system. Gayunpaman, kung ang iyong sanggol ay nagpakita ng malubhang sintomas na hindi nawawala, mas mabuting pumunta agad sa emergency room. Maaaring nagkakaroon ng allergic reactions ang iyong sanggol, at posibleng mauwi ito sa anaphylaxis. Humingi ng tulong kaagad kapag nangyari ito.

Konklusyon

Siguradhung sundin ang schedule ng bakuna sa bata sa Pilipinas upang maprotektahan ang iyong sanggol laban sa mga sakit. Kung pipiliin mo man ang mga pampublikong health center o mga pribadong pediatrician, ang pagpapabakuna sa tamang oras ay magbibigay sa iyong anak ng malusog na simula sa buhay. Para sa madaling pag-book ng appointment, gamitin ang NowServing para sa pediatrics consultation.

Kung interesado kang subaybayan ang schedule ng bakuna ng iyong sanggol gamit ang NowServing Baby Book, maaari mo itong ma-access sa pamamagitan ng pag-download ng NowServing app at pagtiyak na ang pediatrician ng sanggol mo ay nasa NowServing.

The post Schedule ng Bakuna sa Bata sa Pilipinas: Magkano at Saan Dapat Pumunta Para Maturukan appeared first on NowServing Health.

Sipon, tapos ubo, tapos konting lagnat. Gagaling, babalik sa school, tapos makalipas ang sampung araw, nandiyan na naman. At nagsisimula ka nang mag-isip kung may mali sa resistensya ng anak mo.

Malamang wala. Pero may mga senyales na hindi dapat ipinagsasawalang-bahala, at doon nakasalalay ang lahat.

Bakit palaging ganito ang unang buwan

Sa loob ng bakasyon, kakaunti lang ang tao sa paligid ng anak mo. Pagpasok ng klase, biglang sabay-sabay ang dose-dosenang bata sa isang silid, may hawakan sa pinto, may hiraman ng lapis, may pila sa canteen.

Young children catch several viral respiratory infections a year, and those infections cluster when they are newly exposed to a large group. Sa madaling salita, hindi ito depekto sa resistensya.

Kaya ang paulit-ulit na sipon sa unang buwan ay may paliwanag, at hindi ito nangangahulugang mahina ang anak mo. Karamihan ay lumilipas sa loob ng ilang araw nang walang antibiotics, dahil virus ang dahilan at hindi bacteria.

Ang linya na hindi mo dapat lalampasan

Magpatingin agad, o pumunta sa ospital, kung may:

• Hirap sa paghinga, mabilis na paghinga, o humihigop ang dibdib sa bawat hinga
• Lagnat na lampas tatlong araw, o lagnat na bumabalik pagkatapos gumaling
• Sobrang antok, mahirap gisingin, o hindi kumikilos gaya ng dati
• Walang ihi sa loob ng walong oras, walang luha kapag umiiyak, tuyong labi
• Kombulsyon
• Sanggol na wala pang tatlong buwan na may lagnat

Ang mga ito ay hindi bahagi ng ordinaryong sipon. Hindi ito ang pagkakataon para maghintay ng isa pang gabi.

Ang isang bagay na hindi mo dapat hulaan

Sa panahon ng tag-ulan, may isa pang tanong na sumasabay sa lagnat, at hindi mo ito dapat sagutin sa bahay. Ang lagnat ba na ito ay ordinaryong virus, trangkaso, o dengue? Magkatulad sila sa simula, at magkaiba ang bilis ng pangangailangan.

May hiwalay kaming gabay para doon, dahil hindi ito dapat ipinipilit sa isang talata. Basahin ang paano matukoy ang sipon, trangkaso, at dengue, at ang dengue warning na madalas huli nang mapansin.

Alamin kung anong doktor ang para sa lagnat ng bata at para sa ubo at sipon. Kung may nakita kang senyales sa listahan, magpatingin sa pediatrician sa NowServing.

This article is for general information only and is not a substitute for professional medical advice, diagnosis, or treatment. If symptoms are severe or getting worse, see a doctor or go to the nearest hospital.

The post ‘Bagong pasukan pa lang, may sipon na naman’: bakit paulit-ulit ito, at kailan dapat mag-alala appeared first on NowServing Health.

Maaaring nasubukan mo na itong gawan ng paraan sa pamamagitan ng pag-inom ng gamot, ngunit paano kung panandaliang ginhawa lamang ito?

Ang dalawang ugali na paulit-ulit na binabalikan

Ang una ay pinipigil mo ang ihi mo ng ilang oras. Bacteria naturally clears when urine flushes it out. The longer urine sits, the more time bacteria has to multiply. Kung kaya’t mas madalas ang infection o UTI mo.

Ang pangalawa ay nangyayari pagkatapos dahil hindi mo tinapos ang pag-inom ng antibiotics. Maaaring mabuhay ang natitirang bacteria. Ito ang isa sa mga dahilan ng antimicrobial resistance, na tinatawag ng World Health Organization na isa sa pinakamalaking banta sa pangkalusugan sa mundo. Kapag nagbalik ang impeksyon, mas mahirap na itong gamutin.

At ang leftover na antibiotics? Hindi mo alam kung tama ang gamot para sa bacteria mong meron ngayon. Baka tama noon. Hindi ibig sabihin tama ngayon.

Kailan hindi na ito ordinaryong UTI

May punto kung saan hindi na dapat inuulit ang parehong solusyon. Madalas itinuturing ng mga doktor na paulit-ulit ang UTI kung dalawa sa loob ng anim na buwan, o tatlo sa loob ng isang taon. Doon na hinahanap ang dahilan, hindi na lang ang lunas.

At may mga senyales na hindi na dapat hinihintay pang lumipas. Magpatingin agad kung may:

• Lagnat at panginginig
• Sakit sa bewang o likod
• Pagsusuka
• Dugo sa ihi

Ibig sabihin nito, maaaring umakyat na ang impeksyon sa kidney. Hindi ito ang sakit na hinihintay mong mawala mag-isa.

Ang bahaging nasa iyo

Ito ang totoo: ang UTI ay ginagamot ng doktor, pero ang pagbalik nito ay madalas nasa mga oras na hindi mo pinapansin.

Walang isang inuming gamot ang kayang bumawi doon. Pero kapag inayos mo ang dalawang ugali na iyon, at pinatingnan mo na ito sa halip na hulaan, madalas doon nagtatapos ang cycle.

Uminom ka ngayon. Tumayo ka mamaya. At kung pangatlo mo na ito ngayong taon, alamin kung ano ang tinitingnan ng doktor sa paulit-ulit na impeksyon at kung sino ang tamang espesyalista para sa problema sa ihi.

Kung ayaw mo nang maghula, magpatingin sa doktor para sa kidney at ihi sa NowServing. Kung night shift ka, basahin din kung ano ang ginagawa ng puyat sa katawan mo.

This article is for general information only and is not a substitute for professional medical advice, diagnosis, or treatment. If symptoms are severe or getting worse, see a doctor or go to the nearest hospital.

The post ‘Pinipigil ko lang ang ihi ko sa trabaho’: ang ugali sa likod ng paulit-ulit na UTI appeared first on NowServing Health.

Panic attack ba ito, o atake sa puso?

Ang totoo: hindi mo ito matitiyak mula sa loob

Magkahawig ang dalawa dahil pareho silang totoong pisikal.

Sa panic attack, ang alarm system ng katawan ay bumubukas kahit walang panganib. Tunay ang adrenaline. Tunay ang bilis ng tibok. Tunay ang hirap sa paghinga. Hindi ito guni-guni at hindi ito kahinaan.

Sa heart attack, may bahagi ng puso na hindi nakakatanggap ng dugo. Ang mga sintomas ay maaaring magmukhang eksaktong pareho mula sa loob.

Ang mga doktor ay may mga bagay na tinitingnan. Ang panic attack ay kadalasang umaabot sa rurok nito sa loob ng mga sampung minuto at unti-unting humuhupa, may kasamang pangingilig ng kamay at takot na mamatay. Ang heart attack ay mas madalas na parang may bumabagsak o pumipisil sa dibdib, kumakalat sa braso, panga, leeg, o likod, at lumalala kapag gumagalaw.

Basahin mo iyan nang mabuti, tapos basahin ito: hindi sapat ang listahang iyan para pagdesisyunan mo ito mag-isa. Nagsasapawan sila. At sa mga babae, ang heart attack ay mas madalas na dumarating nang walang klasikong sakit sa dibdib. Minsan pagduduwal, pawis na malamig, hirap sa paghinga, o sakit sa panga o likod lamang.

Ang panuntunang ginagamit ng mga doktor

Ito ang payoff, at hindi ito checklist. Isa itong panuntunan.

Kapag hindi ka sigurado, ituring mo itong puso, at magpa-emergency room.

Walang doktor ang magagalit sa iyo dahil pumunta ka. Ang panic attack ay hindi nagiging mas mapanganib dahil na-check ka sa ER. Ang heart attack ay nagiging mas mapanganib bawat minutong hindi.

Pumunta agad sa pinakamalapit na ospital, o tumawag ng tulong, kung ang sakit sa dibdib ay:

• Tumatagal nang higit sa ilang minuto, o umaalis at bumabalik
• Kumakalat sa braso, likod, leeg, panga, o tiyan
• May kasamang malamig na pawis, pagduduwal, o pagsusuka
• May kasamang matinding hirap sa paghinga
• Lumilitaw habang naglalakad, umaakyat, o nagbubuhat

Huwag kang magmaneho papuntang ospital kung ikaw ang may sintomas. Magpasama.

At kung panic attack nga ito

Kapag nasuri ka na at malinis ang puso mo, may pangalawang bahagi ang kwentong ito, at hindi ito dapat itinatapon.

Ang panic attack ay ginagamot. Hindi ito bagay na dapat mong pagtiisan habang buhay, at hindi ito nawawala sa pamamagitan ng pagsabi sa sarili mong tibayan mo ang loob mo. May therapy, may gamot, may mga paraan ng paghinga na natututuhan sa pagsasanay.

Kaya ang tamang tanong ay hindi kung alin ito. Ang tamang tanong ay kung sino ang susunod mong makakausap. Kung ER muna, tama iyon. Pagkatapos noon, may isa pang pinto.

Alamin kung anong doktor ang para sa sakit ng dibdib at para sa mabilis na tibok ng puso. Basahin ang tungkol sa panic attack at first aid.

Kapag naayos na ang emergency, magpatingin sa psychiatrist o sa cardiologist sa NowServing. Basahin din ang tungkol sa high blood at sa myth ng sakit ng batok at kung ano ang ginagawa ng night shift sa katawan.

This article is for general information only and is not a substitute for professional medical advice, diagnosis, or treatment. If symptoms are severe or getting worse, see a doctor or go to the nearest hospital.

The post Bumibilis ang tibok ng puso at hirap huminga: panic attack ba o atake sa puso? appeared first on NowServing Health.

Tapos meron naman parang may kumakatok sa isang bahagi ng ulo mo. Maaari kang makaranas ng pagkasilaw ng mata sa ilaw at pagduduwal. Kung susuriin mo, dumarating ito sa parehong bahagi ng buwan, at hindi ito coincidence lamang.

Ang timing ang pinakamalaking pahiwatig

Ilang araw bago dumating ang regla, may nangyayaring mabilis na pagbaba ng estrogen sa katawan.

That drop is a recognized migraine trigger. Ang ilang babae ay may migraine buong buhay nila; ang iba ay sa mga araw na ito lang ito dumarating. Ang tawag dito ay menstrual migraine.

Menstrual migraine attacks tend to last longer, hit harder, and resist ordinary pain relievers more than migraines at other times of the month. Kaya nga hindi ito basta sakit ng ulo na pinipilit mong tiisin sa trabaho. Iba ang lakas nito, at may dahilan iyon.

Kaya rin mas madalas ang migraine sa mga babae kaysa sa mga lalaki. Hindi ito dahil mas mahina ang babae sa sakit. Ito ay dahil may buwanang siklo ng hormones na wala sa kabila.

Ang paraan para malaman kung ito nga

Hindi mo kailangan ng test para dito. Kailangan mo ng dalawang buwan at isang listahan.

Isulat ang unang araw ng bawat regla. Isulat ang bawat araw na sumakit ang ulo mo, at kung gaano katindi. Dalawang buwan lang, at kadalasan lalabas na ang hugis nito sa harap mo.

Ito ang dadalhin mo sa doktor. Hindi ang pakiramdam. Ang pattern.

Isipin si Mia, 29. Sampung taon niyang inisip na stress sa trabaho ang dahilan. Nang isulat niya ang dalawang buwan, dalawang araw bago ang regla, bawat buwan. Walang stress na ganoon ka-regular.

Kailan hindi na ito dapat hintayin

May mga sakit ng ulo na hindi na dapat pinag-aaralan sa bahay. Pumunta agad sa ospital kung ang sakit ng ulo ay:

• Biglaan at napakatindi, ang pinakamatindi sa buong buhay mo
• May kasamang lagnat at matigas na leeg
• May kasamang panghihina, pamamanhid, o pagkalito
• Nagdudulot ng pagbabago sa paningin o pagsasalita
• Dumating pagkatapos ng pagkabagok sa ulo

Hindi ito ang senyales ng menstrual migraine. Ibang usapan ito, at emergency.

Sa lahat ng iba pa, ito ang payoff: ang sakit ng ulo na may schedule ay may dahilan, at ang dahilan na iyon ay may pangalan at may lunas. Marami ang nakakabawi kapag alam na kung kailan ito darating, dahil may magagawa ka bago pa ito dumating.

Isulat ang dalawang buwan. Iyon ang unang hakbang, at kaya mo iyon simula bukas.

Tingnan ang iba’t ibang uri ng sakit sa ulo at ang kahulugan ng lokasyon nito, o alamin kung anong doktor ang para sa sakit ng ulo. Kung handa ka nang ipatingin ang listahan mo, maghanap ng neurologist sa NowServing.

Kung may kasama itong delayed period o hindi regular na siklo, basahin ang tungkol sa delayed period. Kung may kasamang matinding pagod, basahin ang pagod o anemia.

This article is for general information only and is not a substitute for professional medical advice, diagnosis, or treatment. If symptoms are severe or getting worse, see a doctor or go to the nearest hospital.

The post Sakit ng ulo na dumarating bago mag-regla: bakit mas matindi ito sa mga babae appeared first on NowServing Health.

Kaya ganito ang naging pag-iisip natin: kapag walang sakit ang batok, wala namang problema. At kapag 25 ka pa lang, malayo pa ang usapang iyon.

Dalawa iyang mali, at ang pangalawa ang mas mapanganib.

Ang problema sa sakit ng batok

Maaaring sumakit ang batok ng taong may mataas na presyon. Pero maaari ring sumakit ang batok dahil sa pagkakatulog nang mali, sa buong araw na nakayuko sa laptop, o sa stress.

Ang sakit ng batok ay hindi maaasahang senyales, dahil dalawang beses itong nagkakamali. Nariyan ito kapag walang high blood. At wala ito kapag meron.

Ito ang mas mahalagang bahagi. According to the World Health Organization, most people with hypertension don’t feel no symptoms at all. Kaya nga tinatawag itong tahimik. Hindi ito nagpaparamdam habang unti-unti nitong sinisira ang mga ugat, ang puso, ang bato, at ang mata.

Kung sintomas ang hinihintay mo, ang hinihintay mo ay ang pinsala.

Bakit hindi na ito pinag-uusapan ng matatanda

Dati, ito ay problema ng mga nasa apatnapu pataas. Hindi na ngayon.

Ngayon, ang hindi regular na pagkain, ang mataas na asin sa mga instant at processed na pagkain, ang kakulangan sa tulog, ang trabahong nakaupo buong araw, ang timbang, ang stress ay maaaring magdulot ng pagtaas ng presyon ng dugo.

Marami nang nasa dalawampu ang may mataas na presyon at hindi nila alam, dahil walang sumusukat.

Ang tanging paraan, at ito ang totoong sagot

Walang sintomas na maaasahan. Isang bagay lang ang nagsasabi kung high blood ka o hindi, at iyon ay ang sukatin ito.

Ganito kasimple:

• Magpasukat sa botika, sa health center, o sa opisina kung may clinic
• Kung may sariling BP monitor, umupo muna nang limang minuto, huwag magsalita habang sinusukat
• Isang mataas na basa ay hindi diagnosis. Ang doktor ang nagkukumpirma nito gamit ang paulit-ulit na sukat sa magkaibang araw

Sa pangkalahatan, ang presyon na umaabot ng 140/90 sa paulit-ulit na pagsukat ay itinuturing na mataas. Ang mas mababa sa 120/80 ang karaniwang tinuturing na normal. Pero ang numero mo ay para sa doktor mong bigyang-kahulugan, hindi para sa Google.

Kung may napakatinding sakit ng ulo, sakit sa dibdib, hirap sa paghinga, malabong paningin, o biglaang panghihina ng isang bahagi ng katawan, pumunta agad sa ospital. Emergency ito.

Ang mabuting balita: limang minuto lang ang kailangan para malaman ang bagay na tinatago sa iyo ng katawan mo nang tahimik. Wala kang mararamdaman. Iyon nga ang punto.

Sukatin mo ngayong linggo. Basahin ang tungkol sa mas malalang senyales na hindi dapat ipinagsasawalang-bahala, o alamin kung anong doktor ang para sa high blood.

Kung mataas ang nasukat mo, magpatingin sa internist sa NowServing. Basahin din ang tungkol sa asukal at prediabetes, at kung paano makilala ang panic attack sa atake sa puso.

This article is for general information only and is not a substitute for professional medical advice, diagnosis, or treatment. If symptoms are severe or getting worse, see a doctor or go to the nearest hospital.

The post Hindi sakit ng batok ang senyales ng high blood. Ito ang tanging paraan para malaman. appeared first on NowServing Health.

Tapos tumigil ka sa pagpaparebond, at nagpatuloy pa rin. Sabi mo, kasalanan ng tali, masyadong hinihigpit. Tapos tinigil mo rin iyon.

Anim na buwan na, at nasa lababo pa rin ito tuwing umaga. At sa puntong ito, hindi mo na alam kung dapat ka pa bang mag-alala o hinahanap mo lang ang problema.

Ang pagkakaiba na hindi mo nakikita sa salamin

May dalawang magkaibang bagay na parehong tinatawag nating pagkalagas ng buhok.

Ang una ay pinsala sa hibla. Ito ang galing sa chemicals, init, at higpit ng tali. Nababali ang buhok sa gitna, hindi natatanggal sa ugat. Kadalasan makikita mo ito sa gilid ng noo at sa tabi ng tainga, kung saan pinakamahigpit ang tali. Maiikling putol ang naiiwan.

Ang pangalawa ay galing sa loob. Hindi ito nakatuon sa isang bahagi. Pantay-pantay itong nanipis sa buong ulo. Lumalapad ang hati mo. Bumababa ang kapal ng buhok kapag itinali mo.

Iyon ang unang tanong: gilid ba o pantay-pantay? Bali ba o bagsak mula sa ugat?

Ang tatlong dahilan na sulit ipa-blood test

Kapag pantay-pantay ang pagnipis, at lalo na kung may kasama itong ibang senyales, may tatlong bagay na madalas hinahanap ng doktor.

• Kulang sa iron: Madalas kasabay ng pagod na hindi nawawala at putla. Karaniwan sa mga babaeng may mabigat na regla.
• Problema sa thyroid: Madalas kasabay ng pagbabago ng timbang na walang paliwanag, panlalamig o pagkainit, at pagbabago sa mood o sa dumi.
• PCOS/PMOS: Madalas kasabay ng delayed o hindi regular na regla, acne sa panga, at buhok na tumutubo sa mukha o tiyan.

May pang-apat na hindi sakit. Pagkatapos ng matinding lagnat, operasyon, panganganak, o napakabigat na stress, maraming buhok ang sabay-sabay na pumapasok sa resting phase, at nalalagas ilang buwan matapos ang pangyayari. Nakakatakot ito habang nangyayari. Kadalasan, kusa itong bumabalik.

Ang senyales na tumatawid sa linya

Ito ang payoff, at simple lang ito.

Ang buhok na nalalagas ay nagiging medikal na tanong kapag pantay-pantay ito sa buong ulo, kapag tumagal nang higit sa tatlong buwan, o kapag may kasama itong ibang senyales sa katawan: pagod na hindi nawawala, regla na nawawala, timbang na kusang gumagalaw.

Kapag isa man lang doon ang totoo sa iyo, hindi na salon ang usapan. Blood test na. At madalas, isang simpleng panel lang ang kailangan para masagot ang tatlong tanong nang sabay.

Hindi ito tungkol sa buhok. Ang buhok ang unang nagsabi.

May gabay kami sa mga karaniwang dahilan ng hair loss, at kung anong doktor ang tamang puntahan. Kung may hinala kang thyroid, tingnan ang mga sintomas ng problema sa thyroid. Para sa presyo ng hormone panel, narito ang gabay sa lab.

Magpatingin sa dermatologist para sa anit at buhok, o sa endocrinologist para sa hormones. Basahin din ang tungkol sa delayed period at pagod o anemia, ang dalawang senyales na madalas kasabay nito.

This article is for general information only and is not a substitute for professional medical advice, diagnosis, or treatment. If symptoms are severe or getting worse, see a doctor or go to the nearest hospital.

The post ‘Akala ko sa rebond lang’: kailan hindi na salon ang dahilan ng pagkalagas ng buhok mo appeared first on NowServing Health.

Ang linya na madalas hindi napapansin

May pagkakaiba ang pagod na nabubura ng pahinga at ang pagod na hindi.

Ang puyat ay may utang na binabayaran o sleep debt. Matulog ka nang maayos ng ilang gabi, bumabalik ang iyong lakas. Samantala, ang pagod na medikal ay hindi ganoon. Nandiyan pa rin ito pagkatapos ng weekend, pagkatapos ng bakasyon, pagkatapos ng lahat ng dapat sana ay nakatulong.

Madali lamang malaman kung nangyayari ito sa iyo. Subukan mo ng tatlong gabi na magkaroon ng maayos na tulog. Kung wala pa ring nagbago, hindi na ito tungkol sa tulog.

Iba pang senyales

Ang pangalawa ay nasa katawan, hindi sa pakiramdam. Panghihina na may kasamang:

• Putla sa labi, sa loob ng talukap ng mata, o sa palad
• Hingal o mabilis na tibok ng puso sa gawaing dati ay madali lang
• Pagkahilo kapag biglang tumayo
• Malutong o manipis na kuko
• Panlalamig ng kamay at paa

Ang pangatlo ay iyong pinakamadalas hindi nababanggit sa doktor, ang regla mo. Mabigat na pagdurugo, o regla na tumatagal nang higit sa isang linggo, buwan-buwan. Menstruating women are among the higher-risk groups for iron-deficiency anemia, at ang dahilan ay simple. Ang dugong nawawala buwan-buwan ay may kasamang iron.

Isipin si Rina, 27. Sinabi niya sa doktor ang pagod. Hindi niya nabanggit ang mabigat na regla, kasi sa isip niya, magkaibang usapan iyon. Iisang usapan pala.

Ang bahaging nagpapagaan

Narito ang magandang balita, at ito ang dahilan kung bakit sulit basahin hanggang dulo.

Ang pagsuri nito ay isa sa pinakamurang blood test na meron. Isang complete blood count, o CBC, ang unang hakbang. Kung kailangan pa, may susunod na test para sa iron. Hindi ito mahaba, hindi ito komplikado.

At ito ang mahalaga: huwag kang uminom ng iron supplement nang walang test. Hindi lahat ng anemia ay kulang sa iron, at ang sobrang iron ay may sariling panganib. Ang test muna ang sagot, hindi ang gamot.

Kaya kung anim na buwan ka nang nagpapaliwanag sa sarili mo, subukan ang tatlong gabi. Kung nandoon pa rin ang pagod, dalhin mo ito sa doktor, kasama ang usapin tungkol sa regla mo.

May ginhawa sa pagkakaroon ng sagot, kahit hindi pa iyon ang sagot na inaasahan mo.

Alamin kung anong doktor ang para sa pagod at panghihina, o magpatingin sa internist sa NowServing. Kapag may diagnosis na, may gabay kami sa mga pagkaing nakakatulong sa anemia. Basahin din ang tungkol sa delayed period at kung kailan medikal na ang pagkalagas ng buhok.

This article is for general information only and is not a substitute for professional medical advice, diagnosis, or treatment. If symptoms are severe or getting worse, see a doctor or go to the nearest hospital.

The post ‘Akala ko normal lang ang pagod ko’: tatlong senyales na hindi na ito puyat appeared first on NowServing Health.